Ma’lumki, joriy yilning 7-aprel kuni O‘zbekiston Respublikasi Prezidenti Shavkat Mirziyoyev raisligida jismoniy tarbiya va sport sohasidagi ustuvor vazifalarga bag‘ishlangan videoselektor yig‘ilishi bo‘lib o‘tgan edi. Mazkur yig‘ilishda sport sohasida o‘tgan yil davomida erishilgan yutuqlar, mavjud muammo va kamchiliklar atroflicha tahlil qilinib, istiqboldagi muhim vazifalar belgilab olindi.
Shu munosabat bilan, Yoshlar kuni doirasida Andijon davlat tibbiyot institutida sport bilan muntazam shug‘ullanib kelayotgan hamda turli musobaqalarda yuqori natijalarga erishgan talabalar, sport klubi a'zolari bilan uchrashuv tashkil etildi. Mazkur uchrashuv institut rektori M. Madazimov boshchiligida o‘tkazilib, unda faol va iqtidorli talabalar, jumladan xorijlik talabalar ham ishtirok etdi.
Uchrashuv davomida sportning yoshlar hayotidagi o‘rni, sog‘lom turmush tarzini shakllantirishdagi ahamiyati hamda davlatimiz tomonidan ushbu sohaga qaratilayotgan e’tibor xususida atroflicha fikr almashildi. Xususan, Prezidentimiz tomonidan sportni rivojlantirish, yoshlarni jismonan barkamol etib tarbiyalash borasida olib borilayotgan izchil islohotlar alohida ta’kidlab o‘tildi.
Rektor o‘z nutqida institutda talabalarning sport bilan shug‘ullanishi uchun barcha zarur shart-sharoitlar yaratilganini, zamonaviy sport inshootlari va jihozlari ularning ixtiyorida ekanini qayd etdi. Shuningdek, u talabalarni sport musobaqalarida faol ishtirok etishga, institut sha’nini munosib himoya qilishga da’vat etib, bu borada rahbariyat tomonidan har tomonlama qo‘llab-quvvatlash davom ettirilishini alohida ta’kidladi.
Uchrashuvda xorijlik talabalarning ham faol ishtirok etgani bugungi kunda institutda tahsil olayotgan yoshlarning millati va kelib chiqishidan qat’i nazar, sportga bo‘lgan qiziqishi yuqori ekanini yana bir bor namoyon etdi. Bu esa, o‘z navbatida, institutda sog‘lom raqobat muhiti va do‘stona hamkorlik aloqalari shakllanganidan dalolat beradi.
