Bugungi kunda tibbiyot sohasida profilaktika yo‘nalishi ustuvor ahamiyat kasb etib, kasalliklarni davolashdan ko‘ra ularning oldini olish samaraliroq va iqtisodiy jihatdan maqbul ekanligi tobora ko‘proq e’tirof etilmoqda. Shu nuqtai nazardan, mazkur konferensiya nafaqat ilmiy tajriba almashish, balki innovatsion texnologiyalarni amaliyotga joriy etishning yangi yo‘llarini belgilab beruvchi muhim platformaga aylandi.

Konferensiyada Rossiya Federatsiyasi, Hindiston, Turkiya Respublikasi, Germaniya Respublikasi, Qozog‘iston va Qirg‘iziston kabi davlatlardan 45 nafardan ortiq yetakchi olimlar, professorlar va mutaxassislar ishtiroki anjumanning nufuzini yanada oshirdi. Xalqaro tajribaning mahalliy ilmiy yondashuvlar bilan uyg‘unlashuvi natijasida profilaktik tibbiyotning istiqbolli yo‘nalishlari keng qamrovda tahlil qilindi. Ayniqsa, raqamli texnologiyalar, sun’iy intellekt, telemeditsina va zamonaviy diagnostika vositalarining profilaktika tizimidagi o‘rni alohida ta’kidlandi.

Plenar kengash doirasida anjumanni institut rektori Madamin Madazimov ochib berib, o‘z nutqida bugungi kunda profilaktik tibbiyotning ahamiyati tobora ortib borayotganini, ayniqsa, innovatsion texnologiyalarni joriy etish orqali aholi salomatligini mustahkamlash imkoniyatlari kengayayotganini ta’kidladi.

Shundan so’ng O‘zbekiston Respublikasi Sog‘liqni saqlash vaziri Asilbek Xudayarov, Oliy ta’lim, fan va innovatsiyalar vaziri Qoʻngʻirotboy Sharipov, Andijon viloyati hokimi Shuhratbek Abdurahmonov tabrik yo’lladilar. Unda mamlakatda sog‘liqni saqlash tizimini modernizatsiya qilish, profilaktik xizmatlarni rivojlantirish va zamonaviy texnologiyalarni keng joriy etish davlat siyosatining ustuvor yo‘nalishlaridan biri ekani alohida qayd etildi.

Anjuman doirasida Andijon davlat tibbiyot instituti rektori Madamin Madazimovga Dog‘iston davlat tibbiyot universiteti "Faxriy professori" unvoni topshirildi.

Konferensiya doirasida tashkil etilgan seksiyalar tibbiyotning turli yo‘nalishlarini qamrab oldi. Profilaktik tibbiyotga bag‘ishlangan seksiyada kasalliklarni erta aniqlash, sog‘lom turmush tarzini shakllantirish va aholi orasida profilaktik madaniyatni oshirish masalalari muhokama qilindi. Bu yerda innovatsion texnologiyalar yordamida kasalliklarni boshlang‘ich bosqichda aniqlash imkoniyatlari, mobil ilovalar va raqamli monitoring tizimlarining afzalliklari haqida muhim fikrlar ilgari surildi.

Yurak-qon tomir kasalliklariga bag‘ishlangan seksiyada esa ushbu kasalliklarning global miqyosdagi dolzarbligi yana bir bor tasdiqlandi. Zamonaviy diagnostika usullari, individual davolash yondashuvlari hamda reabilitatsiya jarayonlarida yangi texnologiyalarning qo‘llanilishi muhokama qilindi. Mutaxassislar yurak xastaliklarini oldini olishda turmush tarzini o‘zgartirish va muntazam profilaktik tekshiruvlarning ahamiyatiga alohida e’tibor qaratdilar.

Jarrohlik yo‘nalishidagi seksiyada minimal invaziv usullar va yuqori texnologik operatsiyalar tibbiyot amaliyotida tobora keng qo‘llanilayotgani ta’kidlandi. Robotlashtirilgan jarrohlik, lazer texnologiyalari va zamonaviy asbob-uskunalar yordamida amalga oshirilayotgan operatsiyalar bemorlar uchun xavfsiz va samarali natijalar berayotgani ilmiy asosda yoritib berildi.

Onalik va bolalik masalalariga bag‘ishlangan seksiyada esa sog‘lom avlodni shakllantirishda profilaktikaning o‘rni muhim ekanligi qayd etildi. Perinatal yordamni takomillashtirish, bolalar kasalliklarini erta aniqlash va ularni samarali davolashda innovatsion yondashuvlar muhokama markazida bo‘ldi. Bu yo‘nalishda ona va bola salomatligini muhofaza qilish davlat siyosatining ustuvor yo‘nalishlaridan biri ekanligi yana bir bor ta’kidlandi.

Turli kasalliklar yo‘nalishiga bag‘ishlangan seksiyada esa tibbiyotning turli sohalaridagi muammolar, yangi diagnostika va davolash usullari hamda ilmiy tadqiqot natijalari keng yoritildi. Bu esa tibbiyotning kompleks yondashuvni talab qiladigan soha ekanligini ko‘rsatdi.

Yosh tadqiqotchilar ishtirok etgan seksiyada esa kelajak ilm-fanining poydevori yaratilayotgani yaqqol namoyon bo‘ldi. Ular o‘z ilmiy ishlanmalari, innovatsion g‘oyalari bilan qatnashib, tajribali mutaxassislar bilan fikr almashish imkoniyatiga ega bo‘lishdi. Bu esa yoshlarning ilmiy salohiyatini oshirish, ularni yangi izlanishlarga ruhlantirish va tibbiyot sohasida yetuk kadrlar sifatida shakllanishida muhim ahamiyat kasb etdi.

Umuman olganda, mazkur konferensiya profilaktik tibbiyot sohasida innovatsion texnologiyalarni joriy etish, xalqaro hamkorlikni kengaytirish hamda ilmiy-amaliy tajribalarni boyitishda muhim bosqich bo‘ldi. Tadbir davomida ilgari surilgan g‘oyalar va ishlab chiqilgan tavsiyalar kelgusida sog‘liqni saqlash tizimini yanada rivojlantirish, aholi salomatligini mustahkamlash va kasalliklarning oldini olishda muhim ahamiyat kasb etadi.