Andijon davlat tibbiyot institutida “Nogironlar huquqlari — har bir nogironligi bo‘lgan shaxs hech qanday cheklovlarsiz ega bo‘lishi lozim bo‘lgan huquq va erkinliklardir” mavzuda davra suhbati tashkil etildi.

Tadbirda institut rahbariyati, professor-o‘qituvchilar, tyutorlar, mas’ul xodimlar, talabalar hamda nogironligi bo‘lgan yoshlar ishtirok etdi.

Tadbir davomida Andijon viloyati Ijtimoiy himoya milliy agentligi bosh mutaxassisi D. Tadjibayeva hamda institutning Yoshlar masalalari va ma’naviy-ma’rifiy ishlar bo‘yicha birinchi prorektori G. Xolmatova so‘zga chiqib, nogironligi bo‘lgan shaxslarning huquq va erkinliklarini ta’minlash, ular uchun teng imkoniyatlar yaratish hamda inklyuziv ta’lim muhitini rivojlantirish masalalariga to‘xtalib o‘tdilar.

Davra suhbati davomida nogironligi bo‘lgan talabalarning fikr-mulohazalari va ehtiyojlari ham tinglanib, ularning ta’lim olishi va jamiyat hayotida faol ishtirok etishi uchun zarur shart-sharoitlarni yaratish yuzasidan takliflar bildirildi.

🔹 Xususan:
— nogironligi bo‘lgan talabalarning individual ta’lim ehtiyojlarini o‘rganish;
— maslahat va ko‘mak berishning “Bir darcha” mexanizmini yo‘lga qo‘yish;
— professor-o‘qituvchilar va tyutorlarning inklyuziv ta’lim bo‘yicha malakasini oshirish;
— “Tengdosh — tengdoshga” ko‘ngillilar harakatini tashkil etish;
— axborot va elektron ta’lim resurslarining inklyuzivligini oshirish;
— bo‘lajak shifokorlarda nogironligi bo‘lgan bemorlar bilan samarali muloqot qilish va ularga tibbiy xizmat ko‘rsatish madaniyatini shakllantirish bo‘yicha maxsus mashg‘ulotlarni tashkil etish kabi takliflar ilgari surildi.

Tadbir yakunida institutda “Tengdosh — tengdoshga” ko‘ngillilar harakatini tashkil etildi. Shuningdek, har bir talaba uchun teng imkoniyat, hurmat va to‘siqsiz ta’lim muhitini ta’minlash borasida amalga oshirilishi lozim bo‘lgan vazifalar belgilab olindi.